REPRODUTOR DE MÚSICA

O Meu Pais - Miro Casabella
Loading the player...

15/12/17

Caravana pola Sanidade, desde Xove







A segunda etapa da Caravana en defensa da Sanidade Pública sairá da Praza do Concello de Xove ás 11 da mañá e rematará no Centro de Saúde de San Cibrao.

A Plataforma da Mariña animámosvos a participar.

Ás 10.45 horas en Xove!#SomosUnhaÁrea

28/11/17

Vémonos na Fontenova




O xoves 30 de novembro é o día da Concentración na defensa da Sanidade Pública.

Son varios, e de todo tipo, os colectivos que apoian esta reclamación: deportivos, educativos,sindicais, de comerciantes...E o Colectivo PENSAMENTO E SEMENTEIRA tamén está aí. E fai un chamamento non só dirixido ás persoas asociadas. A convocatoria de SOMOS UNHA ÁREA-Viveiro é para toda a veciñanza.
Así que xa sabedes o xoves 30 de novembro, ás 8 e media da tarde, estaremos na Vila, na Praza da Fontenova. E se a veciñanza responde, habémola encher.






21/11/17

Bailando tamén nos movemos...



E seguimos movéndonos pola Sanidade Pública. Esta vez a xente de SOMOS UNHA ÁREA-VIVEIRO organiza un baile no  Salón do Conservatorio Profesional de Música. Dous grupos, LABRAX e AUGA MARIÑA serán os animadores desta actividade reivindicativa. O baile dará comezo ás 19:30 horas do sábado 25 de novembro.
O noso Colectivo, que apoia as reclamacións da Plataforma en Defensa da Sanidade Pública, chama á veciñanza a botar un pé nesta nova xornada polas melloras da Sanidade Pública.
Así que, bailando, tamén nos movemos.

07/11/17

Concerto da Petit Band


Segue o calendario de actividades programado por SOMOS UNHA ÁREA-Viveiro. O vindeiro xoves día 9 de novembro teremos un concerto da Petit Band do Conservatorio Profesional de Música. Unha formación composta por dez músicos que dirixe o profesor Delio Represas Carrera.


Delio, iniciou a súa andaina musical dirixindo a Banda de Salceda de Caselas e a de O Rosal. Tamén dirixiu a de Santa Cruz de Ribadulla, a Coral Polifónica de Burela e a Banda Municipal de Viveiro. Foi, tamén, director da Orquestra do Festival do Landro e da Big Band do Conservatorio de Música de Viveiro.

O concerto Pola Sanidade Pública dará comezo ás oito da tarde no salón multiusos do Concello de Viveiro. 


O noso Colectivo, que fai parte da Plataforma en Defensa da Sanidade Pública, chama á veciñanza a este acto, un máis dos que SOMOS UNHA ÁREA-Viveiro ten programado para manifestar que a nosa Comarca non quer o cambio de modelo do mapa sanitario encamiñado a centralizar as prestacións  en Lugo.



01/11/17

Somos unha Área




A Asemblea Informativa do día 30 de outubro serviu para que os colectivos con vida activa en Viveiro se achegaran até o Salón de Usos Múltiples do Concello e participaran nesta reunión que organizou SOMOS UNHA ÁREA-VIVEIRO.
Neste acto aberto a Colectivos e veciñanza en xeral participaron, convidados polos organizadores, dous membros da Plataforma en Defensa da Sanidade Pública da Mariña, Adolfo Corral  e Monserrat Porteiro, que informaron sobre as situación actual pola que está a pasar o Hospital da Costa e os centros de Atención Primaria.
As máis de 200 persoas asistentes, que encheron o local do Concello, deron a súa aprobación ao calendario de actividades reivindicativas que SOMOS UNHA ÁREA-VIVEIRO lles propuxo.

                                                               ( Fotografías de SOMOS UNHA ÁREA-VIVEIRO)

Así, a primeira destas actividades para apoiar as reclamacións que está a facer a Plataforma vai ter, o domingo 5 de novembro, como protagonistas aos atletas que o Clube Deportivo EGOVARROS convoca para celebrar a XIX Carreira Popular Concello de Viveiro, Memorial Julián Bernal. Neste acto os deportistas participantes han facer un pequeno percorrido, ao inicio da proba, portando a faixa que a Plataforma en Defensa da Sanidade Pública da Mariña está a mostrar nas manifestacións  concentracións e actos en moitos dos concellos da comarca.

  O noso Colectivo vai apoiar todos estas actividades e anima ás asociacións que aínda non se adheriron á Plataforma a que o fagan canto antes. As melloras na Sanidade Pública que estamos a reclamar son cousa de toda a xente.

26/10/17

Sumando apoios


O noso Colectivo súmase a esta covocatoria e anima a todo o movimento asociativo de Viveiro para que participe nesta Asemblea do luns día 30 de outubro.
Asociacións de Comerciantes, clubes deportivos, colectivos culturais e veciñais, Comunidades de Montes, Cofradías...,todos e todas apoiando as reivindicacións da Plataforma. 
#somosUnAreaSanitaria

19/10/17

Onde a veciñanza é a protagonista


Foi en 2015 cando o noso colectivo organizou un debate arredor da deterioración do areal de Covas. O debate tivo lugar o 27 de febreiro na sala da planta baixa da Biblioteca Municipal e nel participaron, moderados polo Presidente do noso Colectivo, o biólogo Alexandre García, o Práctico do Porto Andrés Díaz, o capitán de Pesca J. Pino e o arquitecto do Concello de Viveiro, Santiago Meitín.



Despois deste primeiro debate, a veciñanza constituiu o Colectivo SALVAR A PRAIA DE COVAS que organizou moitas actividades denunciando a situación  e reclamando solucións para o areal: asembleas veciñais, unha cadea humana no areal, exposicións de pintura de artistas locais,  petición aos Magos de Oriente, reunións cos responsábeis de Portos e Concello de Viveiro...A veciñanza concretou as súas reclamacións no trasvase de area, no reforzo do muro de paseo marítimo e na iniciación dun estudo de Dinámica de Litoral.
















Agora,por fín, e despois de moitos anos de desleixo deste areal, a veciñanza conseguiu que Portos de Galiza rexenerara a praia trasvasando 30.000 metros cúbicos de area da parte oriental, na zona do Cembedo, á zona máis afectada pola falta de area, desde Os Castelos até a primeira das pérgolas do Paseo.

Desde  PENSAMENTO E SEMENTEIRA, parabenizamos á veciñanza e nomeadamente  ao colectivo SALVAR A PRAIA DE COVAS pola súa constante e orixinal campaña durante estes  dous últimos anos. Aínda fica moito por conseguir, mais por algo se empeza.


28/06/17

Homenaxe a Xoán Carlos Basanta


Homenaxe a Xoán Carlos Basanta.
(Sábado 1 de Xullo ás 19:00 no CENIMA de Foz)

Amigas e amigos:

O vindeiro 1 de Xullo ás 19:00 homenaxeamos ao noso amigo e compañeiro Xoán Carlos González Basanta, nun acto público que se celebrará no CENIMA de Foz, e no que pretendemos lembrar e recoñecer a quen foi o noso presidente durante tantos anos e ao noso amigo de sempre.

As mulleres e os homes da Pomba do Arco non precisamos dun día para lembrar a Basanta, a súa memoria e o seu exemplo, acompáñanos todos os días, nas actividades que organizamos, moitas deles deseñadas por el, nos cartazes que facemos, onde se atopa o noso anagrama que Basanta encargou a Suso Peña, ou no nome da nosa asociación, bautizada polo propio Basanta após ler un poema do mesmo título do poeta surrealista Francés Robert Desnos.

Queremos simplemente convidarvos a este acto, que nos acompañedes e acompañedes a Basanta o vindeiro 1 de Xullo no CENIMA, que lembredes e lembremos ao noso amigo e veciño.



19/06/17

Na Ínsua


De esquerda á dereita: Francisco Luis R. Guerreiro (Colectivo PeS ), Manuel Miranda Ruíz ( Mariña Patrimonio ), Francisco X. Martínez Pérez ( crego e historiador ) e Roberto Pena Puentes ( arqueólogo xefe da Dirección Xeral de Patrimonio da Xunta de Galiza ).



16/06/17

Visita guiada á Cova

                                                                                                        Foto: Pedro Michelena


A segunda parte da actividade que temos programada para o sábado 17 de xuño consiste nunha visita guiada á Cova de San Xoán Vello. Non é esta a primeira vez que o noso Colectivo organiza á visita a esta Cova. Na fotografía do amigo Pedro Michelena, feita na última das visitas--xuño do 2016--poden verse parte dos integrantes daquela "Camiñada polas Covas de Covas".

 Que houbo en San Xoán Vello? vai ser á pregunta á que tratarán de dar resposta Francisco Xavier Martinez Pérez, Manuel Miranda Ruíz e Roberto Pena Puentes. De seguro que despois de participar nesta Mesa Redonda todas as persoas asistentes á mesma saberemos algo máis do que até o de agora coñecíamos.

Sabemos, iso si que a antiga igrexa de Covas existiu neste lugar até o ano 1738. Tamén coñecemos a testemuña de Nicolás Taboada Leal...Este sábado 17 volveremos do Santo Vello con máis información e co desexo de que, tanto esta Cova, como a da Doncela--coñecida tamén como Forno dos Mouros ou Cova dos Encantos--sexan, canto antes, protexidas  e declaradas posíbeis xacementos arqueolóxicos.

E para rematar este comentario, dúas preguntas:
Nos anos 60, que se vería desde a Cova de San Xoán Vello e que hoxe non podemos ver?


                                                                                            Foto do Blogue "El Deseado"

Pois as vagonetas da Mina da Silvarosa circulando polo ar camiño da Ínsua.

E agora que veremos desde ese mesmo lugar?

                                                                                                             Fotografía: PeS

Se  o eucalipto que medra diante da Cova de San Xoán Vello nolo permite, a vila de Covas ( con moitas máis edificacións ).




14/06/17

Unha igrexa engulipada polo mar?



A Cova de San Xoán Vello de Covas
A Cova de San Xoán Vello está na parroquia de Covas, concello de Viveiro (Lugo), onde chaman Concha ou Porto de Escourido.
Cóntase que a orixe do nome ten que ver coa aparición no lugar, unha Noite do San Xoán, dun home de cabelo e barba branca, vestido cunha túnica e cunha vara ao lombo. Se cadra, dise, o vello era o mesmísimo San Xoán, que seica estivo alí convivindo con outras xentes. Por iso se escolleu como santo padroeiro da parroquia.
Tamén se conta que desde aquela aparición non sucederon máis naufraxios naquela zona polo que a cova, ao dicir dalgúns, foi usada por moito tempo como templo dedicado ao santo patrón.
En 1738 construíuse unha nova capela e trasladouse o culto ao Coído Vello, onde, despois de varias reformas e ampliacións, aínda sigue agora a igrexa parroquial.
Conta a lenda que a igrexa do santo vello foi asolagada, engulipada polo mar da Concha, mais non a imaxe (da construción?, do santo?) que aínda se albisca reflectida sobre a auga cando a preamar das mareas máis grandes.

Unha orixe do chamado soño de San Xoán
Tamén se dá conta do motivo polo que a imaxe do San Xoán que hai na igrexa parroquial ten un lagarto no lombo. Cando o santo andaba polo deserto, mentres durmía apoiado nunha pedra, o lagarto subíuselle enriba e xa non baixou. Quen o ve di que dorme coma un anxiño.

http://www.galiciaencantada.comhttp://www.galiciaencantada.com

13/06/17

Nicolás Taboada Leal e as augas da Cova




Lembramos hoxe aquí ao viveirés Nicolás Taboada Leal. Taboada escribiu, entre outras obras, Hidrología médica de Galicia .



Nesta obra, publicada en 1887, dedícalle un capítulo á Cova do Santo Vello, na parroquia de Covas. Titúlao AGUAS DE COBA e, entre outras cousas, dí:

"Na nosa mocidade estivemos diferentes veces nesta admirábel gruta, e lembramos que naquela época aínda se conservaban restos das tres paredes, testeira e laterais do antigo templo. Entón aínda existían os ocos ou criptas nas que tiñan estado colocados os altares, e tampouco se tiñan borrado enteiramente os sinais dalgunhas pinturas, que aínda se notaban en varios puntos da caverna..."

Mais deixamos  a cousa así...Na Mesa Redonda do sábado 17, continuaremos coa historia.

12/06/17

Quen vai intervir na Mesa Redonda?


Francisco Xavier Martinez Pérez é un estudoso do tema que nos vai a informar sobre as orixes da antiga igrexa de Covas. Viveirés e actualmente arcipreste de Ortegal-As Pontes. Publicou traballos de investigación histórica, entre outras, na Revista de Estudos Mindonienses e tamén escribiu unha reseña sobre a antiga igrexa parroquial de Covas.


Manuel Miranda Ruíz, actual presidente da activa asociación MariñaPatrimonio. Miranda é un incansábel defensor do patrimonio cultural da Mariña Luguesa. Participou, xunto co presidente do noso Colectivo e membros do Goberno Municipal de Viveiro na reunión que o pasado mes de marzo tivo lugar nas dependencias da Dirección Xeral de Patrimonio para reclamar a protección das covas da Doncela e de San Xoán Vello.


Roberto Pena Puentes, arqueólogo e actualmente Xefe do Servizo de Arqueoloxía da Dirección Xeral de Patrimonio da Xunta de Galiza.

Desde o Colectivo PENSAMENTO E SEMENTEIRA agradecemos a colaboración de Martinez, Miranda e Pena que fan posíbel esta actividade.

Tamén agradecemos a colaboración do Concello de Viveiro e a dos membros de Protección Civil.

10/06/17

O sábado 17 de xuño Mesa Redonda na Ínsua



Xa temos data para a Mesa Redonda: o sábado 17 de xuño. 
 A actividade tería lugar, se o tempo o permite, na área etnográfica da Ínsua moi perto da cova. Na Mesa Redonda participarían o estudoso Francisco Xavier Martinez Prieto, Manuel Miranda, presidente de Mariña Patrimonio e  o xefe do servizo de arqueoloxía da Dirección Xeral de Patrimonio, Roberto Pena Puentes.
A actividade que titulamos “Que houbo en San Xoán Vello?” darái comezo ás 18:30 horas. Unha hora máis tarde, ás 19:30 está programada a visita guíada á cova.


08/06/17

Que houbo en San Xoán Vello?



                                                                                                  Fotografía: M. Miranda


O pasado mes de marzo o presidente do noso Colectivo e membros da directiva de Mariña Patrimonio, acompañados por María Loureiro, alcaldesa de Viveiro, e polo  tenente de alcalde Suso Fernández estiveron na Dirección Xeral de Patrimonio da Xunta de Galiza interesándose pola protección das covas de San Xoán Vello e da Doncela.
Daquela era a nosa intención complementar estas xestións coa divulgación do pasado destes sitios. Así que, agora, estamos a programar un acto público e unha visita guiada á Cova do Santo Vello. No acto participarían o estudoso Francisco Xavier Martinez Prieto, Manuel Miranda, presidente de Mariña Patrimonio e un arqueólogo.
Axiña concretaremos data e lugar. 



29/05/17

Conversa con Manuel López

A editorial Embora organizou en decembro do pasado ano, en Ferrol, a presentación de Tres balas. Hai uns días o clube de lectura da libraría Bahía, en Foz, programou unha das súas sesións para conversar co autor arredor desta novela curta e agora  a libraría Porta da Vila  organiza esta presentación en Viveiro.



O autor, Manuel López, Manolo de Lar, nado en 1956 en Catarou, na parroquia viveiresa de Galdo, impresor e  tamén autor do libro Camiños de escuma e vento (2013),  achega agora aos seus conveciños a súa  primeira ficción novelada.


O libro de Manuel López conta con ilustracións doutro viveirés, Xosé L. Neira Brochs.


28/05/17

O meu país é verde, neboento...


O concerto didáctico co que onte nos agasallou SondeNós vai ficar durante moito tempo na memoria das persoas que enchimos o salón de actos do Conservatorio Profesional de Música de Viveiro.



Alí, entre outras pezas soou O meu país, a "fantasía ou recreación--así a presentou o director Plácido Travieso--desde o respecto, desta fermosa melodía de Miro Casabella" co texto de Xoán Manuel Casado.
E, como se pode comprobar na fotografía, tivemos un dobre agasallo: o partillar este concerto co cantautor Miro Casabella.


Neste concerto, por indicación do director de SondeNós--profesor do Conservatorio de Viveiro--cambiamos a disposición do cenario. E a verdade todo ficou moito ben.


Grazas a SondeNós por este fermoso agasallo de Música e Lingua, por esta Identidade.





11/05/17

LUCUS ENSEMBLE




Lucus Ensemble  nace en Lugo no ano 2014. Despois de coincidir en diversos concertos benéficos, un grupo de músicos con amplia experiencia pensan na posibilidade de crear unha formación estable na capital lucense para o desenvolvemento de proxectos musicais adaptados para un ensemble mixto vento-corda-percusión baixo a dirección musical de Alejandro Troya. Éste farase cargo tamén, xunto con outros membros da agrupación,  de ultimar as adaptacións e arranxos necesarios do programa, sendo ésta unha das características identificativas do grupo, xa que todo o repertorio está arranxado por e para o Ensemble. Conta cun plantel fixo de once músicos:

  • Oboe                                      Mateo Bande
  • Frauta                                    Cristina Díaz
  • Clarinete                                Miguel A. Díaz
  • Clarinete                                Adrián Balboa
  • Clarinete baixo                       Santiago Noriega
  • Saxofón                                 Alejandro Troya
  • Trompa                                   Moisés López
  • Fagote                                    Xosé Fernández
  • Violonchelo                           Cristina Nogueira
  • Contrabaixo                           Araceli Martínez
  • Percusión                               Carlos Vázquez