Xornadas sobre Lingua e Cultura

CALLÓN, SES, DIÉGUEZ E FELIPE SENEN PARTICIPARÁN EN VIVEIRO NAS XORNADAS SOBRE LINGUA E CULTURA
O vindeiro xoves día 6 de novembro o profesor, escritor Carlos Callón abrirá en Viveiro as Xornadas sobre Lingua e Cultura que organiza o noso Colectivo.

Os relatorios terán lugar na sala da planta baixa da Biblioteca Municipal de Viveiro, na Praza Maior e darán comezo ás 20:30 horas. Nos seguintes xoves do mes de novembro intervirán tamén: a cantautora Mª  Xosé Silvar, SES; o escritor Lois Diéguez e pechará estas xornadas o museólogo e escritor Felipe Senén.

Carlos Callón, (Ribeira, 1978). Escritor, profesor e activista.

Profesor de Lingua e Literatura Galega en secundaria e pesquisador sobre sociolingüística e literatura, materias sobre as cales é un prolífico conferencista.

Entre os varios libros que publicou salientan os títulos Como defenderes os teus dereitos lingüísticos (2011, premio Redelibros ), Amigos e sodomitas (2011, premio Vicente Risco e premio Fervenzas Literarias) e Como falar e escribir en galego con corrección e fluidez (2012).

É presidente de Honra da Mesa pola Normalización Lingüística (a maior asociación cultural de Galiza), entidade que presidiu entre 2002 e 2014. 

COIRA FALA DE "18 COMIDAS"

Adiante co CINECLUBE!

CONVIDÁMOLOS A "18 COMIDAS"...

Seguimos co ciclo e este mércores 29 de outubro convidámolos a "18 comidas", a película que J. Coira nos trae a Viveiro.



“18 comidas” trata dun músico da rúa que reencontra o amor da súa vida; dous borrachos almorzan cubatas con marisco; un home cociña, cociña e cociña para a muller que nunca chega; dous homes quérense mais agóchanse;  una cociñeira soña con ser cantante… Todas estas historias cruzanse ao longo dun día de ficción en “18 comidas”.

Jorge Coira, nacido en Rábade (Lugo), comezou a súa carreira profesional a finais dos 90.
A súa formación, fundamentalmente autodidacta, complementouse coa asistencia a cursos e obradoiros con profesores como Michael Radford, Víctor Erice, Allan Starski, Béatrice Caufman, Robert Lovenheim, Víctor Duplá  e Mariano Barroso, ademais de participar na primira edición do Berlinale Talent Campus.
A súa experiencia inclúe cine, televisión, vídeocreación e teatro.
No terreo do cine, tralos comezos en curtametraxes entre as que destacan Mofa e Befa en Gran Liquidación e O Matachín (esta última cun bo percorrido de festivais e premios internacionais), en 2004 estreou a súa primeira longametraxe: O Ano da Carracha.
En televisión, ademais do seu labor en publicidade y videoclips, o seu traballo centrouse na dirección de series, participando en series como Terra de Miranda, As Leis de Celavella, Padre Casares e, recentemente, Luci (unha das primeiras series españolas en ser vendida para a súa versión nos E.E.U.U.); así como a tv-movie Entre Bateas. E desde 2007, dirixe con frecuencia series de ámbito nacional como El Comisario, RIS, Piratas ou Pelotas.
Outro dos terreos nos que máis traballou é o documental, onde destacan os documentais de creación ¿Qué Culpa Tiene el Tomate? (estreado no MoMA en Nova York en 2009), ou  Días de Reparto, ademais de traballos televisivos como Chunda Chunda.

Noite de curtas

O pasado mércores tivemos unha intensa noite de curtametraxes. O cineasta Xacio Baño sorprendeunos con cinco das súas obras. Bo comezo para o ciclo de cine "Dirixido por..." Na foto, feita pola nosa compañeira Ana Mejuto co seu teléfono móbil, pode apreciarse parte do público asistente. Arredor de cincuenta amadores e amadoras do cine que non se asustan cos derrubes do antigo Cine Orfeo--que botaron abaixo ese mesmo día--nen co peche dos Multicines A Mariña. ( E nós, tan cuidados@s que programabamos as sesións de cine para os mércores por ser este o día de descanso nas tres salas de A Misericordia! ).
Grazas Xacio pola túa contribución ao noso ciclo. Grazas pola túa "relación de acordes", pola túa visión estereoscópica,  polos teus "anacos", por estar entre o lóstrego e o trono, por "ser e voltar". A túa avoa non leva razón. Sabemos que vai ser de ti. Grazas por te dedicares ao cinema.

XACIO BAÑO ABRE O CICLO DE CINE "DIRIXIDO POR..."

O mércores 22 de outubro Xacio Baño abre o ciclo de cine "Dirixido por...". Será ás 20.30 horas, no salón de actos do IES María Sarmiento de Viveiro. A entrada, é libre até completar o aforo.

O Colectivo PENSAMENTO E SEMENTEIRA achegará a Viveiro directores e directoras de cine para que presenten a súa obra e participen nun coloquio posterior co público asistente.

O primeiro dos directores que intervirán é Xacio Baño.

Xacio naceu  en Xove , en 1983. Estuda Cinematografía na Universidade de León, especialidade en Montaxe. Despois de colaborar en todo tipo de curtametraxes, documentais, formatos, etc., desempeñando sobre todo tarefas de edición e postprodución, decide dar  o  paso á dirección.

As obras de Xacio Baño obtiveron  varios premios: ALCINE (Sección Oficial, por Anacos), Curtocircuito (Mellor Curtametraxe, por Estereoscopía), Festival de Cans, (Mellor Curtametraxe por Estereoscopía), Festival de Málaga, (Sección Oficial – Cortos por Estereoscopía), Toulouse Cinespaña,  (Sección Oficial – Cortos por Estereoscopía)…

Máis recentemente, o prestixioso Festival Internacional de Cinema de Locarno, un dos eventos que califican para os Oscar, contou con presenza galega. A curta de non ficción Ser e voltar, de Xacio Baño—que tamén veremos en Viveiro--proxectouse no marco da sección Pardo di Domani. A curta de Baño amosa as tentativas do propio director de explicarlle aos seus avós en qué consiste o seu traballo no cinema.

Agardámosvos pois o mércores 22 no salón de actos do IES María Sarmiento para achegarnos ao cine da man do director Xacio Baño.

"Por ceibar a voz" no Teatro Pastor Diaz

Desde hai uns meses as asociacións culturais da comarca vimos desenvolvendo actividades para homenaxear ao músico  Miro Casabella. O pasado 25 de abril foi  a vila de Ribadeo a que acolleu o primeiro dos concertos “Por ceibar a voz” e agora o nos Colectivo organiza en Viveiro, no Teatro Pastor Díaz, o segundo dos concertos de homenaxe ao músico do Valadouro.

 Será o vindeiro 7 de xuño, ás oito e media da tarde e nel intervirán, ademais de Miro Casabellabella o cantautor guardés Tino Baz, a Coral Polifónica Alborada, David Bellas e músicos do Conservatorio Profesional de Viveiro.

Xa facemos parte da Federación de Cineclubes

A Asemblea da Federación de Cineclubes de Galiza celebrada a principios deste mes de maio admitiu a nosa solicitude para facer parte da Federación.
Así que agora, xa como membros activos desta Federación, programaremos máis actividades de Cineclube.
Terémosvos informados.

Venres 14 de marzo, ás 8 da tarde...

...e non ás 20:30 horas como tiñamos informado anteriormente.
A entrada é libre até completar o aforo.

"Por que se incrementa o recibo da luz? "

Continuando coa Programación de Inverno o Colectivo PENSAMENTO E SEMENTEIRA organiza o vindeiro 14 de marzo un acto informativo baixo o título"Por que se incrementa o recibo da luz? ".

O acto, que estará a cargo do economista Adrián Dios Vicente, ( Serra de Outes, 1989 ), Licenciado en Economía pla USC e Mestre en Desenvolvemento Económico e Innovación. autor dunha tese doutoral sobre o sistema eléctrico, terá lugar na Sala da planta baixa da Biblioteca Municipal de Viveiro o venres 14 de marzo ás 20:30 horas.
A entrada a este acto público é libre até completar o aforo da sala.

Por outra banda o colectivo viveirés informa que segue aberta a exposición 

" Casares. luces e sombras", do fotógrafo Pepe Ventureira ,que pode verse na Sala da Biblioteca Municipal, na Praza Maior de Viveiro, durante a primeira quincena do mes de marzo, de 19 a 20:30 horas, os días laborabeis.

CASARES, LUCES E SOMBRAS

Casares, luces e sombras é o título da exposición de fotografías coa que nos agasalla Pepe Ventureira.
Estará aberta durante a primeira quincena de marzo na Sala da planta baixa da Biblioteca Municipal.

O vídeo do Recital

O Recital ( Resumo fotográfico )

Vén de rematar o Recital Viveiro con Rosalía. O acto iniciouse coa música do Grupo de Corda do Conservatorio, dirixido polo profesor Cabalar. 

Seguiu unha pequena presentación onde se deu lectura ao Manifesto do Día de Rosalía.

O capitán Pino, non puido estar presente. A esa hora gobernaba o seu barco, mais a través do vídeo chegounos a poesía de Rosalía.

A nena máis aplaudida: Carme Chaves, alumna de Primaria no Colexio de Covas.

Marta Fra, monitora de natación, leu a Rosalía desde a Piscina Municipal.

A xornalista Mar García deleitounos con Campanas de Bastabales.

María do Mar ( Tecín soia a miña tea... ) e María Pal  ( Sen niño ) , no ensaio xeral.

Daniel Noriega recitounos Roxiña cal sol dourado.

O adestrador de fútbol Guillerme Pigueiras, lendo no Campo do Cembedo.

Mar García, María Xosé Penso, Ánxel Vázquez e Paco Chao, entre o público.

Ánxeles Lago, recitou Unha vez tiven un cravo.

Delio Represas, músico, despois de ler  Un repoludo gaiteiro.

E...o cazador, cazado: Abella Albo, do que agardamos o vídeo do Recital.

( Fotografías de Antonio Masafret )

UN RECITAL CON ACOMPAÑAMENTO MUSICAL

Como xa tiñamos anunciado o colectivo PENSAMENTO E SEMENTEIRA conmemorará o Día de Rosalía en Viveiro, o luns 24 de febreiro, contando coa colaboración de persoas de distintas idades e profesións que recitarán poemas da escritora.

Intervirán: Daniel F. Noriega ( empresario ), María do Mar García ( empregada ), Paco Chao
( comerciante ), Delio Represas ( músico ), María Pal ( camareira ), Guillermo Pigueiras
( adestrador de fútbol ), Mª Ánxeles Lago ( xubilada ), Marta Fra ( monitora de natación ), Carme Chaves ( estudante de E.Primaria ),  Mª Xosé Penso ( empregada do Concello ), Mar García ( xornalista ), Ánxel V. Iglesias ( comerciante ) e J. Pino ( capitán de pesca ).

O recital, que contará con acompañamento musical en directo e cunha proxección audio visual, dará comezo ás 20:30 horas, no salón de actos do Conservatorio Profesional de Música de Viveiro.

O MAR DESCOBRE MÁIS RESTOS ...

Os últimos temporais están a descubrir novos restos arqueolóxicos na praia de Area. Apareceron un posíbel morteiro, novos muros ao sul da área onde se fixeron as catas arqueolóxicas, anacos de tellas e cerámica...

O Colectivo PENSAMENTO E SEMENTEIRA comunicou a existencia destes restos ao Servizos de Arqueoloxía da Xunta e á alcaldesa de Viveiro para que tomen as medidas oportunas e eviten o espolio do xacemento que  está  deficientemente protexido e totalmente abandonado.

VIVEIRO CON ROSALÍA

UNHA DUCIA DE VIVEIRESES RECITARÁN A ROSALÍA O DÍA 24 DE FEBREIRO

O colectivo PENSAMENTO E SEMENTEIRA está a organizar un acto de homenaxe a Rosalía de Castro que consistirá na lectura pública de poemas no Conservatorio Profesional de Música de Viveiro. Este recital estará protagonizado por unha ducia de veciñas e veciños de Viveiro e vaise celebrar o luns 24 de febreiro coincidindo co Día de Rosalía. O colectivo viveirés animou a unha ducia de conveciños, de distintas profesións e procedencias a participar neste acto público. Así, neste recital intervirán, empresarios, comerciantes, mariñeiros, músicos, xubilados, empregadas da hostelaría, ou xornalistas.

O acto que dará comezo ás oito e media da tarde, desenvolverase no salón do Conservatorio profesional de Música de Viveiro e contará probabelmente  con unha actuación musical.

DEBATE: ARREDOR DO DEPORTE

O  sábado 1 de febreiro de 2014 temos organizado un debate “ARREDOR DO DEPORTE”.

Dará comezo ás 6 da tarde na sala da planta baixa da Biblioteca Municipal, na Praza Maior en el intervirán:

-Omar González ( Adestrador. Centro Galego de Tecnificación  Deportiva)

-Carlos Gueimunde ( Concelleiro de Deportes. Viveiro )

-Manuel Otero ( Xefe do Servizo de Deportes da Xunta de Galiza )

-Francisco Villanueva ( Presidente da Federación Galega de Triatlón )

O moderador será Matías Nicienza ( Radio Burela

Pretendemos con este debate coñecer de primeira man as dificultades que teñen os equipos de base, as escolas deportivas, os clubes de atletismo... á hora de acceder ás subvencións das institucións, tamén avaliar a rede de infraestruturas existentes no concello para practicar deporte... e todas as cuestións que o público  participante nesta actividade propoña.

Xunta Directiva do

Colectivo PENSAMENTO E SEMENTEIRA

Trailer de "A FAZAÑA DA LIBERDADE"

O documental A fazaña da liberdade percorreu xa distintas vilas e cidades: A Estrada, Lugo, Ferrol, A Coruña, Ourense... e mesmo proxectouse fóra do país, en Bilbo.Agora chega a Viveiro da man do seu director, Seném Outeiro, que estará connosco no salón do IES María Sarmiento o vindeiro mércores 29 de xaneiro para falar da película e da biografía de Alexandre Bóveda. O acto dará comezo ás 8 da tarde ( ollo á hora ! ) e a entrada é de balde, até completar o aforo. Velaí vos deixamos o trailer.

Trailer "A Fazaña da Liberdade" from Filmika Galaika on Vimeo.

"A FAZAÑA DA LIBERDADE"

O mércores 29 de xaneiro, ás 20 horas e no salón de actos do IES María Sarmiento, iniciamos a nosa programación de Inverno coa proxección do documental "A fazaña da liberdade" do que hoxe vos deixamos esta ficha:

Ficha artística
Dirección: / Seném Outeiro
Dirección fotografía: / Berto Palacios
Guionista: / Seném Outeiro
Produción: / Roi Carballido 

Ficha técnica
Emisión ou proxección / Centro Galego de Artes da Imaxe (CGAI)
Produtora / Filmika Galaika, S.L. 

Titulo orixinal: A fazaña da liberdade
Tipo: Documental
Xénero: Biográfico
Coprodución
Duración: 90'
Orixe: Galicia
Ano: 2013
Idioma V.O.: galego


O periplo vital dun personaxe influínte, Alexandre Bóveda (1903-1936). Facendista, economista, deseñador das Caixas de Aforros de Ourense e Pontevedra, impulsor do Estatuto de Galicia, integrante do Seminario de Estudos Galegos, cofundador e Secretario Xeral do Partido Galeguista. Contexto e testemuñas históricas aportados por Beiras, Vence, Pousa Antelo, Díaz Pardo, Justo Beramendi e a familia Bóveda, entre outros.

PRIMEIRA XUNTA DIRECTIVA DO COLECTIVO

Na asamblea extraordinaria do pasado 16 de xaneiro elixiuse a primeira Xunta Directiva do noso Colectivo da que fan parte as seguintes persoas asociadas:

-Ana Mejuto Esmorís, Xulia Canoura Díaz, Francisco Rodríguez Balsa ( Vogais ); Xosé A. Goás Basanta ( Secretario), Mª do Mar Chaves Álvarez ( Vicepresidenta ) e Francisco Luís Rodríguez Guerreiro ( Presidente )

As asambleas tiveron lugar no local social, ( R/ Irmáns Vilar Ponte, nº 40, baixo, dereita) , onde tamén se van organizar nos vindeiros meses actividades que serán publicitadas neste blogue e nos medios de comunicación.

Na primeira das asambleas, a ordinaria, deuse conta da actividade desenvolvida desde a constitución do Colectivo, en abril de 2013, até o remate do ano. Foron 9 meses de intensa actividade, con 16 actos públicos polos que pasaron máis de mil persoas. Toda esta actividade foi realizada sen contar con ningún tipo de subvención e soportada polas cuotas das persoas asociadas.

Ademais de programar a actividade para o 2014, os asistentes acordaron constituir un cineclube e solicitar a integración na Federación de Cineclubes de Galiza.  

ASEMBLEAS DO COLECTIVO

                                                       ( Imaxe do público asistente á primeira actividade do Colectivo, e abril de 2013)




O xoves día 16 de xaneiro temos convocadas dúas Asembleas do colectivo que se van celebrar no noso local social , na rúa Irmáns Vilar Ponte, nº 40, baixo, dereita.
Os asuntos a tratar son os seguintes:

1.-Resume das actividades desenvolvidas desde abril de 2013.

2.-Aprobación das contas e balances do ano 2013.

3.-Aprobación dos orzamentos de ingresos e gastos para o 2014.

4.-Aprobación da cota de asociado/a para o 2014.

5.-Aprobación da programación de actividades para 2014.

6.-Elección da Xunta Directiva do Colectivo.

7.-Aprobación , se proceder, dos estatutos para a constitución dun Cineclube e a integración na Federación de Cineclubes de Galiza.

Agardamos a participación de todas as persoas asociadas.

A nosa convocatoria atopou resposta

Este sábado celebrouse a reunión convocada polo noso colectivo para organizar a homenaxe a Miro Casabella. Asistiron representantes de asociacións culturais:  Colectivo Cultural OLLOMAO

 ( Barreiros), AVENTADOS, MARIÑAPATRIMONIO, O MUNDO DE GALEA, A. C. OS CASTROS ( Cangas ), LIGA CÉLTICA GALAICA, A.C. AMADO LAR ( Ferreira do Valadouro ), CASAHAMLET, S.L., CLUBE CULTURAL ELSINORE,  IRMANDADE SAN CAETANO ( Celeiro de Mariñaos) e o Colectivo Cultural BURIL...e outros colectivos que non puideron estar na Casa da Cultura de Ferreira do Valadouro fixeron constar o seu apoio a esta inciativa.

Tamén participaron persoas a título individual como, Ponte Fores ( Foz ), Caxigueiro, Emilio Méndez

( Finca Galea ), Manuel Lourenzo, Carlos López Otero ( Burela ), Evaristo Maseda, J. H. Martinez Mosqueira, Arturo Mogo ou Celso Dourado.

Entre os acordos aos que se chegou  suliñamos o de constituir  unha Comisión Organizadora da homenaxe a Miro Casabella, que se reunirá nos vindeiros días coa finalidade de  facer propostas concretas para unha segunda reunión a celebrar no mes de febreiro.

HOMENAXE A MIRO CASABELLA

O Colectivo PENSAMENTO E SEMENTEIRA vai propor ás asociacións culturais e ás institucións da Mariña a celebración dunha homenaxe ao músico Miro Casabella. Consideramos que o percorrido artístico do compositor e cantante do Valadouro, comprometido desde os anos sesenta coa cultura e co idioma galego, ben merece a gratitude dos mariñaos.

Coa  finalidade de organizar esta homenaxe o noso colectivo convocará nos vindeiros días ás asociacións culturais e veciñais; aos músicos, artistas plásticos e escritores  e a todas as persoas interesadas a unha reunión que terá lugar no Valadouro o sábado 11 de xaneiro. Tamén  solicitará  apoio económico  aos Concellos e á Deputación xa que, de contar coa cooperación destas institucións, poderían participar músicos cos que Miro Casabella tivo relación ao longo da súa traxectoria artística.

Así nos surprendeu David Bellas

Así nos surprendeu David Bellas.
Hoxe colgamos  aquí os tres pequenos vídeos realizados polo amigo Abella.
Agradecementos a David Bellas, a Sara Otero e á actriz Lara Noriega.
Foron catro "Xoves Músicais", moi variados e con calidade.
Volveremos con máis "xoves musicais" no 2014.

Lara Noriega con David Bellas

David Bellas con Sara Otero

"OS VELLOS NON DEBEN DE NAMORARSE"

O colectivo PENSAMENTO E SEMENTEIRA pecha a súa programación de outono con esta representación teatral. Comezamos a nosa actividade de outono o pasado mes de outubro coas proxeccións das películas do festival Amal-2012, seguimos cos "Xoves Musicais" do mes de novembro, informamos sobre a importancia económica da actividade pesqueira en Galiza coa interesante intervención da doutora Mª do Carme García Negro, abrimos a exposición "Represaliados" do pintor Celso Dourado coas músicas de Vadim  Yukhnevich e o sábado 7 de decembro programamos a obra de Alfonso D. Rodíguez Castelao que estará a cargo do grupo "Ollomao" e diirixida por Comba Campoy e Ramón Casas.
Tamén temos que dicer que seguimos a medrar e xa somos máis asociados, que estamos a preparar un local social no casco vello de Viveiro, que andamos ás voltas coa programación do 2014, ( con máis cine, máis debates )...
Terémosvos informados. Mentras tanto, ollo á data: o 7 de decembro..."Os vellos non deben de namorarse".

REPRESALIADOS

Este sábado 30 de novembro abrimos en Viveiro a exposición "REPRESALIADOS" ( Na lembranza do comandante Moreno ), do pintor Celso Dourado. O acto de inauguración terá lugar ás 19 horas na sala da planta baixa da Biblioteca Municipal, na Praza Maior e nel, ademais do pintor intervirá o músico bielorruso Vadim Yukhnevich.
A mostra estará aberta ao público na primeira quincena do mes de decembro, de 19  a 20:30 horas.

Agora sabemos algo máis sobre a importancia económica da pesca...

A profesora Mª do Carme García Negro iniciou a súa intervención no acto informativo organizado polo noso Colectivo lembrando a súa colaboración coa antiga agrupación cultural Sementeira, no ano 1976. Pasou despois a fornecernos de datos que explican a importancia económica da actividade pesqueira na nosa comarca e en Galiza. “Ás veces, os datos publicados polos economistas minimizan o  importante impacto que ten a actividade pesqueira no noso país porque non teñen en conta ás mariscadoras, nen aos empregados en terra, nen aos traballadores de piscifactorías…” Destacou o medre económico rexistrado en Celeiro e en Burela “por riba—dixo—de calquer lonxa galega” e destacou que o 65% do PIB galego está nos concellos costeiros de Galiza. Para a investigadora os mariñeiros galegos souberon gardar o recursos, demostraron que saben pescar e que ademais teñen capacidade empresarial e organizativa”

A interesantísima aportación da doutora García Negro provocou entre as persoas asistentes un animado coloquio que serveu de peche a este acto informativo.

"A IMPORTANCIA DA PESCA NA ECONOMÍA GALEGA"

A economista Mª do Carme García Negro, profesora da USC e investigadora, intervirá nun acto informativo convocado polo noso Colectivo e que terá lugar este venres, 29 de novembro, ás 20:30 horas, na sala da planta baixa da Biblioteca Municipal de Viveiro.

David Bellas ponlle o ramo aos "Xoves Musicais"

David Bellas pecha este xoves 28  o ciclo XOVES MUSICAIS que se veu celebrando todos os xoves de novembro no Conservatorio Profesional de Música de Viveiro.
A actuación dará comezo ás 20:30 horas e a entrada é libre até completar o aforo do local.

A profesora: Montse Expósito Cao

Así foi o Recital Lírico

"Unha marabilla". Esas foron as dúas palabras que empregou o presentador do acto cando, ao rematar este terceiro "xoves musical", despidiu ás persoas que encheron o salón de actos do Conservatorio de Música de Viveiro.
E desta marabilla, deixámosvos aquí unhas pequenas mostras.

María Jesús González Fraga

Mariví Maragoto

...e Plácido Travieso Fernández acompañará co piano...

Despois de ter recibido o Programa do RECITAL LÍRICO deste xoves 21, decatámonos do erro e  é agora  cando reparamos os danos ocasionados ( na nota anterior publicada aquí e nos restantes medios, esquecímonos, nada máis e nada menos!... do pianista que vai acompañar ás tres voces. Trátase do profesor do Conservarorio PLÁCIDO TRAVIESO FERNÁNDEZ. Así e con maíusculas!.

PROGRAMA

-Quella fiamma che m´accende. Benedetto Marcello.

-L´abbandono. Vincenzo Bellini.

-Caro mio ben. Giuseppe Giordani.

-Ma rendi pur contento. Vicenzo Bellini.

-Á Chloris. Reynaldo Hahn.

-Ah, non credea mirarti…La sonambula. Vicenzo Bellini.

-L´heure exquise. Reynaldo Hahn.

-Sogno. Paolo Tosti.

-Ich liebe dich. Eduard Grieg.

-Os teus ollos. Castro Chané.

-As froliñas dos toxos. Eduardo Toldrá. ( Poema de Noriega Varela )

-Canción del olvido. La canción del olvido. J. Serrano.

VOCES:

-Montse Expósito  Cao

( Profesora do Conservatorio Profesional de Música de Viveiro )

-Mariví Maragoto e Mª  Jesús González Fraga

( Alumnas do Conservatorio Profesional de Música de Viveiro )

PIANO:

-PLÁCIDO TRAVIESO FERNÁNDEZ

( Profesor do Conservatorio Profesional de Música de Viveiro ) 

RECITAL LÍRICO NOS "XOVES MUSICAIS"

ARIAS E CANCIÓNS NO RECITAL LÍRICO DOS “XOVES MUSICAIS” DE PENSAMENTO E SEMENTEIRA. 

ESTE XOVES 21, A TERCEIRA ACTUACIÓN DOS “XOVES MUSICAIS” NO CONSERVATORIO.

Este xoves 21 de novembro e continuando coa programación dos “Xoves Musicais” organizados polo colectivo PENSAMENTO E SEMENTEIRA, a profesora de canto do Conservatorio profesional de Música , Monse Expósito Cao e dúas alumnas, Mª Jesús González Fraga e Mariví Maragoto, ofrecerán un recital lírico de arias e cancións. O recital dará comezo ás 20:30 horas no salón de actos do Conservatorio de Música, onde cada xoves deste mes de novembro está programada unha actuación. Os “Xoves Musicais”, abertos pola cantautora ribadense Carme Rodríguez tiveron continuidade coa actuación do grupo de clarinetes “Sol en cuarta” que foi seguido por máis dun cento de persoas. 
A entrada é libre até completar o aforo da sala. 

Por outra banda, informamos que o Colectivo PENSAMENTO E SEMENTEIRA ten programado un acto informativo coa profesora da USC e investigadora, especialista en temas pesqueiros, Mª do Carme García Negro que falará o venres 29 de novembro, ás 20:30 horas na sala da Biblioteca Municipal ( Praza Maior ) sobre “A importancia da pesca na economía galega”.

Concerto de " SOL EN CUARTA"

Un bocadiño de "SOL EN CUARTA"

Para írmonos ambientando aí vos deixamos este  bocadiño de "SOL EN CUARTA".

"SOL EN CUARTA", nos Xoves Musicais

Despois da actuación da cantautora de Ribadeo, Carme Rodríguez, continuamos co ciclo dos Xoves Musicais co Grupo "SOL EN CUARTA" do Conservatorio Profesional de Música. Será o xoves 14 de novembro ás 20:30 horas no salón de actos do centro que colabora co noso Colectivo para encher de música os catro xoves deste mes de novembro.
Alí vos agardamos.

Carme Rodríguez en concerto

Como xa vén sendo habitual, Abella Albo enviounos o vídeo que reralizou da actuación da cantautora Carme Rodríguez quen, por certo, entusiasmou ao público que encheu o salón de actos do Conservatorio Profesional de Música.

Carmen Rodríguez abre os XOVES MUSICAIS

Carmen Rodríguez , unha extraordinaria cantautora de 17 anos, será a encargada de abrir, o vindeiro 7 de novembro, os XOVES MUSICAIS que o noso colectivo organiza en colaboración co Conservatorio Profesional de Musica de Viveiro.
Todas as actuacións deste ciclo serán no salón  do Conservatorio, na Travesia da Mariña, as 20.30 horas. A entrada  é libre até completar o aforo do local.
"Cousas", a peza que lles ofrecemos neste video, é un adianto da súa actuacion en  Viveiro.

NOVAS ACTIVIDADES EN NOVEMBRO

OS XOVES MUSICAIS COMEZAN O VINDEIRO DÍA 7 EN VIVEIRO

ACTUACIÓNS MUSICAIS E UN ACTO SOBRE A PESCA NO PROGRAMA DE OUTONO DE PENSAMENTO E SEMENTEIRA

Rematado o ciclo de cine euroárabe programado o pasado mes polo Colectivo PENSAMENTO E SEMENTEIRA, dá comezo este xoves 7 de novembro un novo ciclo de actividades. Trátase dos “Xoves Musicais”, catro concertos dunha hora de duración que o colectivo de Viveiro organiza coa colaboración do Conservatorio Profesional de Música os catro xoves deste mes de novembro.

Carme Rodríguez, a moza ribadense que acompañou a Ses no concerto de Viveiro, abrirá o programa dos “Xoves Musicais”, o día 7, no salón de actos do Conservatorio de Música. Seguirán despois as actuacións do grupo “Sol en cuarta”, o xoves 14, un grupo de Canto do Conservatorio, o xoves 21 e rematará o ciclo o músico David Bellas, o xoves 28. Todas as actuacións darán comezo ás 20:30 horas.

O Colectivo tamén ten programada, o venres 29, na sala da Biblioteca Municipal, na antiga casa consistorial, un acto informativo coa profesora e economista Mª do Carme García Negro que falará sobre a importancia da pesca como un sector estratéxico na economía galega.

Todos os actos, tanto os “Xoves Musicais” como a intervención da prestixiosa especialista no sector pesqueiro son de entrada libre até completar o aforo dos locais.

Colectivo PENSAMENTO E SEMENTEIRA

"Cine, cine, cine, máis cine por favor..."

" Cine, cine, cine, máis cine por favor..." como na canción de Luís Eduardo Aute. Esta é a petición que facían moitas das persoas que desfrutaron do ciclo de cine euroárabe, unha media de 43 asistentes por proxección. E na Xunta Xestora do Colectivo, tomamos nota: programaremos máis cine nos vindeiros meses.
Agradecemos publicamente a colaboración da Fundación ARAGUANEY-Ponte de Culturas que nos facilitou as cinco películas do ciclo e agardamos que esta colaboración permaneza no futuro. Obrigados tamén pola axuda prestada polo equipo directivo e persoal non docente do IES María Sarmiento onde tiveron lugar as proxeccións do ciclo de cine euroárabe.

 E tamén un agradecemento especial aos asistentes. Sen elas e sen eles non sería posíbel o ciclo, porque sen espectadores non hai cine.
E para rematar aí vos deixamos o agasallo que nos fixo María Chaves na última sesión: uns flocos de millo preparados  para a ocasión. Que vos preste!

Le Thé ou l'Electricité ( Trailer )

Remata o ciclo con "Le thé ou l´electricité"

Este mércores 30 de outubro remata o ciclo de cine euroárabe coa proxección da película que obtivo o premio Amal-2012 á mellor longametraxe documental. Dura 93 minutos e está dirixida por Jerôme le Maire.
"Le thé ou l´electricité" é a historia da modernización dunha pequena vila no corazón do Alto Atlas marroquino. No proceso enfróntanse dúas visións de futuro: mentras uns pensan que o progreso pasa pola construción dunha estrada, outros apostan pola chegada da electricidade. Axiña se decatarán do complicado que resultará chegar a un acordo.
Jerôme le Maire é un guionista e cameraman belga. É tamén o director do longo de ficción "Le Grand´ Tour" (seleccionado  no Festival de Rotterdam e en Cannes ) e do documental "Où est l´amour dans a palmeraie?" nomeado nos European Academy Awards premios ARTE.

DÚAS CURTAMETRAXES NO CICLO DE CINE

O mércores 23 continuamos coa programación de cine. Proxectaranse dúas curtametraxes. A primeira, "ENSEMBLE", dirixida por Mohamed Fekrane  e foi premio Amal-2012 á mellor curtametraxe de ficción.
A segunda será "EID", Palestina,  da autoría do Colectivo Saahed,  premio Amal-2012 á mellor curtametraxe documental.
A boa acollida deste ciclo de cine euroárabe , que o noso Colectivo está a programar en colaboración coa Fundación Araguaney-Ponte de Culturas, anímanos a seguer facendo  actividades. Nos vindeiros días convocaremos un acto informativo sobre a situación da pesca en Galiza e para o mes de novembro... xa vos contaremos.

"BROMAS APARTE" de Vanessa Rousselot o mércores 16 de outubro

Despois da boa acollida que tivo a primeira das sesións de cine euroárabe seguimos co programa. O mércores 16 de outubro proxectaremos "BROMAS APARTE" da directora francesa Vanessa Rousselot que percorreu Cisxordania na percura do humor palestino.
A sesión dará comezo ás 20:30 horas no salón de actos do IES María Sarmiento. O documental dura 54 minutos e proxectase en versión orixinal.

UN CICLO DE CINE EUROÁRABE ABRE A NOSA PROGRAMACIÓN DE OUTONO

O Colectivo PENSAMENTO E SEMENTEIRA abre a súa programación cultural de outono coa proxección de cinco películas de cine euroárabe.

As películas que se proxectasrán dentro deste ciclo pertencen á Fundación Araguaney-Ponte de Culturas, entidade que organiza o Festival de Cine Euroárabe Amal que  é o único festival de cine euroárabe de Europa.

As proxeccións , subtituladas, terán lugar os mércores 9, 16, 23 e 30 de outubro, ás 8 e media da  noite, no salón de actos do IES Mª Sarmiento de Viveiro e a entrada será libre até completar o aforo.

Abrirá o ciclo “Rabat” ,  unha película holandesa dirixida por Jim Taihuttu e Victor Ponten  que conta con tres premios Amal ( 2012 ): á mellor longametraxe de fición,  mellor dirección e mellor interpretación masculina.

“Bromas aparte”,  ( Francia, Palestina ),“Le thé ou l´electricité”, ( Bélxica, Marrocos )  “Eid”,

( Palestina ) e  “Esemble”  (Francia ), dúas longametraxes e dúas curtas serán as películas que se proxectarán en Viveiro neste mes de outubro.

Nos vindeiros días o Colectivo PENSAMENTO E SEMENTEIRA dará a coñecer outras actividades da programación cultural deste outono.

ACTUACIÓN DO MÚSICO DAVID BELLAS

O Colectivo PENSAMENTO E SEMENTEIRA organizou un paseo en bici polo Souto da Retorta. Ao chegaren os participantes ao pé d´O Avo atopáronse cun fermoso agasallo: a actuación do músico David Bellas que interpretou varias pezas da súa autoría, dun repertorio de música clásica e tradicional. 

As persoas que participaron nesta actividade comprobaron o desleixo existente nalgún punto deste percorrido onde hai árbores caídas sobre o camiño. O Colectivo comunicará ao Concello esta situación para que sexa corrixida canto antes.

PASEO EN BICI POLO SOUTO DA RETORTA

O Colectivo PENSAMENTO E SEMENTEIRA segue coas actividades programadas para reclamar unha ciclovía en Viveiro. Esta semana o colectivo instalou pontos de recollida de asinaturas nas rúas de Viveiro e agora prepara un Paseo en bici polo Souto da Retorta para o vindeiro venres día 19 de xullo. O inicio do Paseo será en Chavín, onda a antiga fábrica, e dará comezo contra as oito da tarde. Ao remate do Paseo, ao pé d´ O Avó,  o colectivo agallasará a todos os participantes cun  agasallo sorpresa.

A seguinte actividade, dentro desta programación da reclamación do carril-bici, terá lugar no vindeiro mes de agosto e consistirá nun Paseo nocturno en bicicleta.

Seguimos a recoller asinaturas para reclamar o CARRIL-BICI

Hoxe estivemos a recoller asinaturas para reclamar unha ciclovía en Viveiro. PENSAMENTO E SEMENTEIRA instalou dous postos para facilitar que a veciñanza asinase o escrito que se vai presentar nos vindeiros días diante das Administracións Públicas competentes: Concello, Xunta de Galiza, Xefatura de Costas e  Grupo de Portos.
A acollida non puido ser mellor:en menos de unha hora máis de cen asinaturas no posto que instalamos na Praza da Fontenova.
Nunca tal se viu! A 100 por hora e sen sair da Fontenova!